شَنطِـة السِّـتْ

- حوار في بيت هـاديء -




قالت لها أمها: فيه بنت بتفهم تشتري جزمة مقفولة في الصيف؟ هي دي الجزمة اللي لفّيتِ عليها ساعتين في روكسي؟
مالها الجزمة المقفولة؟ وبعدين أنا ما بحبش ألبس غير النوع ده. مش باحب حد يشوف صوابعي
قالت أمها: وتقولي لي: ماتجيش معايا يا ماما أنا هاروح مع صاحباتي؟ وآدي النتيجة. مش عارفة أم العريس هتقول عليكِ إيه؟
واحنا مروحين اشترينا سندويتشات طعمية من عند الشبراوي. تخيلي، الساندويتش كان مليان جدا كأنه واحدة حامل
قال أخوها: لما العامل يكون متخانق مع صاحب المحل يملا الساندويتش ع الآخر علشان يخسّره
********
قالت أمها: وإيه الشنطة اللي إنتِ جايباها دي؟ كل دي شنطة؟ مش سنك خالص
قال أخوها: كل ما الست تكبر كل ما شنطتها تكبر، البنت بتمسك شنطة صغيرة، لما تكبر حاجتها تكتر وشنطتها تتخن، علشان كده جدتك بتمشي شايلة شنطة سفر
أول مرة أمسك شنطة عليها وردة. أنا مش باحب كده خاص. باحب حاجاتي تكون سادة وبسيطة
ترى هل كانت المرأة في العصر الحجري تمسك حقيبة في يدها؟ ثمة أدلة أثرية تؤكد أن المرأة في العصر الفرعوني كانت تمسك حقيبة يد تضع فيها أدوات الزينة الخاصة بها. لكن ماذا عن المرأة التي عاشت في العصر الحجري، ترى كم تزن حقيبة يد من الجرانيت؟
تفتكري لو لبستِ مقفل قوي كده العريس هيبصّلك؟ ممكن يفتكرك جاية من ورا الجاموسة. العرسان دلوقت عايزين البنت الرّوشة
********
فكرة قاصرة جدا أن نظنّ أن المرأة في العصر الحجري كانت تمسك حقيبة من الجرانيت. هل هذا يعقل؟ أين البوص والخوص والليف والكتان وكل الخامات الأخرى؟
البنت دي هتجنني. أنا مش شرحتلك ازاي تعملي عجينة السكر والليمون على البوتاجاز؟
يا ماما ما عادش حدّ بيعمل الحاجات دي دلوقت. دي بتوجع موت. فيه اختراع اسمه كريمات
إنتي عايزانا نروح نقابل العريس في الميعاد؟ إنت اتجننتِ؟ يقولوا علينا مكروبين. لازم البنت تتقل شوية وتوصل متأخرة. افهمي يا حمارة
العريس اللي فات شاف القصيّر قال دي رقاصة. العريس اللي قبله شاف الحشمة قال دي فلاحة. أنا مش عارفة أعمل إيه خلاص
********
قال محمد منير: سألت شيخ الطريقة مارضيش يجاوب سؤالي********
إنتي عارفة إنتِ عندك كام سنة دلوقت؟ عارفة فاضل لك قد إيه ونقول عليكِ عانس؟
قال أبوها: كل ما وزنك يزيد كل ما سعرك ينقص في السوق
الدكتور قال لي أرمي جلد الفرخة بالذات لأنه مليان هرمونات وهو اللي جاب لي تكيّس على المبايض. دكتور التخسيس عايزني أوزن الأكل بميزان حساس زي بتاع الدهب
********
الثالث والعشرون من يناير 1952: كتيبة من سيدات مصر تحاصر بنك باركليز البريطاني بغرض منع الناس من التعامل معه. استمر الحصار 95 دقيقة بقيادة د. درية شرف الدين، وحضر 300 شرطي منعوا السير في شارع قصر النيل********
ترى هل كانت د. درية تحمل حقيبة يدها أثناء الإضراب؟
يا نهار أسود؟ بتقري إحسان عبد القدوس يا قليلة الأدب؟ كل دي قصص تحت المرتبة؟
عارفة قصة أنا حرة؟ شفتِ البنت عملت إيه؟ على فكرة اللي يقرا القصة غير اللي يشوف الفيلم
تسافري لوحدك يعني إيه؟ إنت اتجننتِ؟ بلا رحلات بلا هباب
********
1992
قالت الباحثة ليلى أحمد في كتابها: المرأة والعنوسة في الإسلام.. إن دعوة قاسم أمين لتحرير المرأة ليست خالصة، وإنها تنبع من موقف أبوي ذكوري كاره للمرأة يدعو للهيمنة الذكوريّة وفقا لإساءة تفسير الإسلام، كما أنه يقصُر واجبات المرأة على تلبية الحاجات الجسمانية والذهنية والأخلاقية لزوجها وأطفالها، دون دور اجتماعي خارج البيت********
شوفي يا نيفين (مايكل بولتون) بيقول إيه في الأغنية: قلت باحبك لكن كذبت. مش معنى كده إنه ما بيحبهاش. هي دي بقى الخدعة، بصّي الكوبليه التاني بيقول إيه: لأن اللي باحسه شيء أكبر من الحب. شفتِ بقى؟
قال أخوها: اختراع شنطة اليد ده اختراع هايل. ياريت لو الرجالة يشيلوا حاجة زي كده، بدل ما الواحد جيوبه منفوخة بالشكل ده
يعني تفتكري العريس هيرفضني علشان لابسة جزمة مقفولة في الصيف؟ ده إذا أخذ باله أساسا
أمه يا هبلة هي اللي هتاخذ بالها، وهو ده المهم
********
الرابع من ديسمبر 1947: مريم فخر الدين تفوز بلقب فتاة الغلاف في مصر وتقول: ربما أكون أجمل وجه في العالم
********
عمرك شفتِ واحدة ترفض عريس علشان اسمه مش عاجبها؟ البنت دي خلاص هتشلني
يا ماما ازاي أعيش مع واحد بالاسم ده طول عمري؟ أنده له ازاي؟ إنتِ ليه مش عايزة تفهميني؟
خطيب منال ده أمّور قوي.. هي قالت لك اسمه إيه؟
ما قالتش، بس هو شكله كده تامر، وممكن يدّي على هيثم
أنا مش باحب الشنط اللي ما فيهاش سوستة صغيرة للفلوس، شوف لي واحدة تانية بس تكون سودة وفيها سوسَتْ كثير، منهم واحدة من برة وتكون طرية مش ناشفة
أنا كرهت الشغلانة دي خلاص. حاجة تكفّر. امتى ربنا يتوب علينا بقى
شفتِ اللي حصل؟ الكريم ساح من الحر في الشنطة وبوّظ لي كل الأوراق اللي كانت فيها
********
كتب أنيس منصور في عمود مواقف: قررت ألا أتزوج حتى أجد المرأة المثالية. ثم وجدتها، لكنها كانت تبحث عن الرجل المثالي
********
قال الطبيب في برنامج صباح الخير يا مصر إن بقاء الفتاة حتى سن متقدمة بدون زواج يعرضها للكثير من المشكلات الصحية والنفسية، فقد يؤدي هذا إلى زيادة إفراز هرمون الإستيروجين وزيادة في نشاط الخلايا المبطنة للرحم، كما أن تعرضها للضغوط الاجتماعية قد يؤدي إلى إصابتها باكتئاب نفسي حاد، وينعكس هذا الأمر على بشرتها حيث يزيد نشاط الحبوب الدهنية ذات الرؤوس السوداء، ويكثر الشعر في الوجه والجسم ويتساقط شعر الرأس وتفقد البشرة نضارتها********
شفتي روبين ويليامز في فيلم (بابا الشغالة)؟ شفتي ضرب الحرامية ازاي بشنطة إيده؟
الشراب انقطع تاني، مش معقولة الشرابات دي، ما بتستحملش خالص
هاتيلي حباية الضغط. الضغط زاد عليّ
يا ابني ما يصحش الراجل يفتح شنطة مراته. ده كلام؟! ثلاثين سنة متجوّز أمك لغاية دلوقت ما اعرفش شنطتها فيها إيه
يعني ما فيش ولا عريس من كل اللي اتقدموا عجبك؟ ده طويل وده قصير. ده تخين وده رفيّع. أجيبلك عرسان منين تاني؟
ماهو مافيش ولا واحد فيهم ممكن نقول عليه: إنسان طبيعي
إيد الشنطة انقطعت. تخيلي! ما بقالهاش معايا أسبوع. العالم الناصحة بقى هي اللي تدقق كويس في الشنطة وتبص على الخياطة قبل ما تشتريها
********
ارتفاع سعر الجلد الطبيعي يرفع أسعار الحقائب والأحذية. التجار يشتكون من الكساد********
تفتكري يا شيري لو الواحدة شنطتها اتسرقت إيه اللي ممكن يحصل؟ الموبايل والفلوس والبطاقة وكارنيه النادي وكارت الميناتل واشتراك المترو وصور إخواتك وصباع الروج وإزازة المونيكير والإيشارب والبونبون ومفاتيح البيت والمرايا وكارنيه نادي الفيديو والمشط والقلم الباركر ووصل النور والبلوك نوت والخاتم القديم ودفتر التليفونات ومناديل الجيب وشريط الريفو وشريط النوفالجين ومحلول العدسات ونظارة الشمس وباكو اللبان والهولز وبكرة البلاستر والبارفان وبنس الشعر وطوابع البوسطة ودفتر البنك
.......
يا نهاري.. ده أنا ممكن أموت فيها
********
- د. ميشيل حنا -

اقتباس المشاركة الأصلية كتبت بواسطة أحبني مشكوووووووووووووووووووور على موضوعك المتميز والرائع وتقبل مروري

العفو
مشكوره عالمرور
مرورك الي ميز الموضوع